الاسم: محمود شوقي أبو ناجي 
اليوم الأول من يوميات فشار
يحكيه: سمير الشرقاوى
هاااااااااااااى يا جماعة
ازيكو... كويسين..؟
طيب الحمد لله محدش يسألنى مالك لأنى مش ف المود خالص كان يوم متعب أوى مدرسة ومتابعة وحاجات كتير الله يكون فى عون المدرسين قولوا آمين .
بس اقولكم بصراحة أنا بدأت ارتاح شوية من التعب .
حد يسألنى ليه ؟
محدش عاوز يسأل
اوكى أنا هقول من غير إحراج وأنا راجع من المدرسة طبعا أنا بمشى طريق مش طويل يعنى 2كيلو بس .
لا طبعا أنا مينفعشى اركب .. مدرس بالعقد هيركب مواصلات كمان يبقى خراب والمزانية هتبوظ المهم قابلت صاحبى وصديقى وحبيبى عادل اللى قولتلكم عليه (الفشار شوية وبينخع شويتين بس محدش يقوله أحسن يزعل) المهم وبعد ما سألنى عن الأحوال وعرف أنى دلوقتى مدرس ملوو هدومة وشياكة بمية جنية فى الشهر قام قالى أما يا سمير أنا كنت تلميذ شقى شوية .......
- بجد ما أنا عارف هتقولى أنا حافظك
- لا أنت متعرفشى حاجات كتير
- والله ....؟
- أنا كنت صعب أوى من أولى ابتدائى
- والله.....!
- آه أنت مش مصدق
- لا أنا مصدق أنا اقدر مش اصدق دانت حبيبى أوى
- احكيلك موقف عاملتة ف المدرسة وأنا فى أولى ابتدائى
- لية أنت لسة فاكر أيام أولى ابتدائى !
- طبعا يابنى أنا فاكر قبل كدة كمان
- كويس خالص
- مرة كنت فى الفصل زى ما أنت عارف بحب اقعد فى التختة الاخيرة يعنى بحب أكون على راحتى
- آه وبعدين
- مقولتلكشى أنا كنت قاعد مع مين
- مع مين؟
- البت أسماء زميلتنا
- والله؟ دى بت كانت حلوة أوى
- طبعا يابنى أنا اعرف بنات وحشة انت بتهزر
- لا ازاى وانت كنت ماشى معآها من أولى ابتدائى ؟!
- آه وقبل كدة كمان المهم مطولشى عليك كان المزاج عالى أوى وكنت بنقول كلام حب وحبه هزار والذى منة وحبة تحابيش
- يآه دانت كنت صايع أوى على كدة . بس أنا معرفشى انك كنت كدة يابنى
- دة فى الخباثة بس المهم البت لما الكلام أخدنا قام قعدت تضحك وصوتها على أوى جة الاستاذة يقولى اية يا عادل أنت مش نأوى تخلص بقى ؟ والا اية
- يآه هوة كان عارف انك بتضحك مع البت اسماء ومقلشى لكم حاجة
- آه طبعا يابنى كان عارف وكان بيسكت لانة عارف اية اللى هيحصل له لو قالى بم
- يآه وأنت ف أولى ابتدائى !
- يابنى من يومى محدش يقدر يقولى بم المهم قالى كلمة مش عاجبتى
- اية بجد قالك اية؟!
- بلاش إحراج
- والنبى تقولى.....
- قالى اسكت متتكلمشى
- عادى
- لا مش عادى أنت عاوزة ياخد عليا المرة دى اسكت المرة اللى جاية اسمع الحصة يا ترى اية اللى هيعملة بعد كدة
- لا صح متخلشى الأستاذ يا خد عليك
- المهم قولت لة أنت متأكد من اللى بتقوله
- قال آه أنا هخاف منك يعنى
- أنت متأكد ؟
- آه طبعا هتعمل اية
- وأنت كنت هتعمل اية
- مآهية البت أسماء سالتنى زيك كدة برضو
- عادى جدا أنا طلعت موس من بقى وعملت فى وشة أربعة فى ستة
- يآه أنت كنت بتحط موس فى بقك وأنت فى أولى ابتدائى؟
- آه يعنى اسيب المدرسين يتنططو عليا
- لا ازاى همة نسيو نفسهم ومين أنت . واية حصل بعد كدة؟
- عادى الأستاذ راح المستشفى وأنا اتفصلت اسبوع آهو اسبوع راحة من القرف دة
طبعا أنا كنت وصلت البيت اتحايلت علية انة يدخل معايا مرضيشى أكيد عندة مهمة قومية
بعدها مكنتش قادر أبطل ضحك عادل فى أولى ابتدائى عمل كدة أمال عمل اية بعد كدة الله اعلم ؟
كتبها محمود شوقي أبو ناجي في 02:03 مساءً ::
لا يوجد تعليق